លោក Abhinav Dixit មកពី​ទីក្រុង ញូដេលី   និង​លោក Aditya Kumar  មក​ពី​ទី​ក្រុង មុំបៃ  ប្រទេស ឥណ្ឌា ចាប់​ ផ្តើម ទស្សន កិច្ច រយៈ​ពេល ១ សប្តាហ៍ ចាប់​ពី​ថ្ងៃ​១៨ - ២៤  ខែ​មីនា  ឆ្នាំ២០១២  នៅ​កម្ពុជា​។ ទស្សន​កិច្ច​របស់​អ្នក​ជំនាញ​ទាំង​ពីរ​រូប  កើត មាន ឡើង ក្រោយ ពេល រដ្ឋា​ភិបាល នៃ ប្រទេស​​ទាំង​​ពីរ​បាន​ចុះ ហត្ថ​លេខា​លើ​អនុស្ស​រណៈ​យោគ​យល់​គ្នា​មួយ  ដើម្បី​បង្កើត​មជ្ឈម​ណ្ឌល​អភិវឌ្ឍន៍​សម​ត្ថ​ភាព  និង ទេព​កោសល្យ​កម្ពុជា  -​ ឥណ្ឌា  កាល​ពី​ថ្ងៃ​ទី១  ខែកុម្ភៈ   ឆ្នាំ២០១២​។អ្នក​ជំនាញ​ការ​ឥណ្ឌា​ទាំង​ពីរ​រូប  មាន​គម្រោង​ជួប​ពិភាក្សា​ជា​មួយ​អាជ្ញាធ​រខេត្ត​សៀម​រាប​នៅ​ថ្ងៃ​ទី​២០  ខែមីនា  ឆ្នាំ២០១២  ជួប​ពិភាក្សា ជាមួយអាជ្ញាធរខេត្តព្រះសីហនុនៅថ្ងៃទី២១  ខែមីនា  ឆ្នាំ២០១២  និងជួបពិភាក្សាជាមួយ  ឯកឧត្តម       ជុន វ៉ាត  អគ្គ​លេខា​ធិការ អាជ្ញាធ​រ​​ជាតិ​​ទទួល​​​បន្ទុក​កិច្ចកា​រអភិ​វឌ្ឍន៍​វិស័យ  បច្ចេកវិទ្យា  គមនាគមន៍  ព័ត៌មានវិទ្យា  និង​មន្រ្តី​ពាក់​ព័ន្ឋ​នៅថ្ងៃ​ទី​២២  ខែមីនា  ឆ្នាំ​២០១២​។ លោក Abhinav Dixit មាន ប្រសាសន៍​ថា  បេស​កកម្ម​របស់​លោក  គឺ​ដើម្បី​ពិនិត្យ​មើល​ស្ថាន​ភាព​មជ្ឈម​ណ្ឌល​បណ្តុះ​បណ្តាល ដែល​មាន​ស្រាប់​ទាំង​បីក​ន្លែង  (ភ្នំពេញ  សៀមរាប  ព្រះសីហនុ) ព្រម​ទាំង​ពិនិត្យ​​ជ្រើស​រើស​បេក្ខ​ជន​ដែល នឹង ត្រូវ ទៅ​​បណ្តុះ​បណ្តាល​នៅ​ឥណ្ឌា​រយៈ​ពេល​៦​ខែ។

លោក Abhinav Dixit មានប្រសាសន៍បន្តថា  សម្តេច​អគ្គ​មហា​សេនា​បតី​តេជោ ហ៊ុន សែន  នាយ​ករដ្ឋ មន្រ្តី​នៃ​ព្រះរាជា​ណាចក្រ​កម្ពុជា   ក្នុង​​ដំណើរ​ទស្សន​​កិច្ច​ផ្លូវ​រដ្ឋ​ទៅកាន់​សាធារណ​រដ្ឋ​ឥណ្ឌា​កាល​ ពីខែធ្នូ  ឆ្នាំ២០០៧  សម្តេច​បាន​ស្នើ​សុំ​ឲ្យ​ឥណ្ឌា  បាន​​ចុះ​​ហត្ថ​លេ​ខា​​លើ​​អនុស្ស​រណៈ​​យោគ​​យល់​​គ្នា​​មួយ​​ស្តី​ពី កិច្ច​​សហ​ប្រតិ​បត្តិ​ការ​លើ​វិស័យ​មួយ​ចំនួន​រវាង​ប្រទេស​ទាំង​ពីរ។